തിരക്കേറിയ നഗര വീഥിയുടെ ഓരത്ത്‌ ആള്‍ക്കൂട്ടം. ഒരു മിനി സര്‍കസ് അരങ്ങേറുകയാണവിടെ. ചെണ്ട കൊട്ടുന്ന വൃദ്ധന്‍. ചാടിക്കളിക്കുന്ന കുരങ്ങ്. ചെണ്ടയുടെ താളത്തിനും കുരങ്ങിന്‍റെ ഡാന്‍സിനും ഒപ്പം ഒരു കൊച്ചു പെണ്‍കുട്ടി തല കുത്തി മറിയുന്നു. തോളിലേക്ക്‌ കാലുകള്‍ മടക്കി തലയുടെ പിറകിലൂടെ ഒടിച്ചെടുത്ത്‌ ഒരു റബ്ബര്‍ പന്ത് പോലെ.. ആ മറിയലിനിടയിലും തകര പാത്രത്തിലേക്ക് തെറിച്ചു വീഴുന്ന നാണയ തുട്ടുകളിലേക്ക് അവളുടെ നോട്ടം.
തൊട്ടപ്പുറത്തെ വീഡിയോ ഷോപ്പിനു ചുറ്റും മറ്റൊരു ആള്‍കൂട്ടം. എല്ലാ കണ്ണുകളും ടീവീ സ്ക്രീനിലേക്ക്. സ്റ്റാര്‍ സിങ്ങറിന്‍റെ മറ്റൊരു എപിസോഡ് തുടങ്ങാറായി.